წიგნის ანოტაცია
„ამდენჯერ რატომ მიმაღებინე ის ძალის მცენარეები?“ ეკითხება კარლოს კასტანედა დონ ხუანს და გულისხმობს იმ ჰალუცინოგენური მცენარეებით მიღებულ გამოცდილებას, რომელთა აღწერა მისი პირველი წიგნების მთავარი თემაა. „იმიტომ, რომ გონებაჩლუნგი ხარ“, მიუგებს მასწავლებელი, უზადო მეომარი და ცოდნის კაცი. „ძალიან დუნედ აზროვნებ და შენს შესაჯანჯღარებლად სხვა გზა არ მქონდა“.
კარლოს კასტანედა ათ წელიწადს იყო დონ ხუანის მოწაფე და მის ცხოვრებაში – რა თქმა უნდა, მოულოდნელად – დგება დრო, როდესაც მასთან პაემანზე მოდის ცოდნა ვეება ფარვანას სახით და ფრთებით მოაქვს ცოდნის ოქროსფერი მტვერი. მას მოჰყვება კიდევ ერთი უზადო მეომარი, რომელიც ავტორის მეგზურია ცოდნის გზაზე – დონ ხენარო.
წესები, რომელიც ადამიანთა ჩვეულებრივ სამყაროს ფორმას უნარჩუნებს, ირღვევა, მის უკან ჩნდება ახალი წესები და ახალი სამყარო და, შეგირდი ამის სიმძიმემ რომ არ გასრისოს და შიშმა არ გააგიჟოს, ბრძენი ბერიკაცები ხუმრობენ, ბავშვებივით ცანცარებენ და ცხოვრების სიხარულით ტკბებიან. უფსკრულში გადახტომის მერე აღარაფერი იქნება ისეთი, როგორიც ადრე იყო. მომდევნო საფეხურზე გადასვლისას წინა საფეხურს ეთხოვები. ეს კი სევდიანი, ამაღელვებელი და მშვენიერია.