წიგნის ანოტაცია

გამოცემა წარმოადგენს პირველ სრულ მონოგრაფიას ქართველი კინორეჟისორის, სცენარისტის, მსახიობის, დუბლაჟის რეჟისორისა და მხატვრის – კოტე მიქაბერიძის (1896-1973) შესახებ.

ქართული კინოავანგარდის ცენტრალური ფილმის »ჩემი ბებია« (1929) რეჟისორს განსხვავებული სტილის, ფორმისა და ესთეტიკის კიდევ შვიდი სხვა კინოსურათი ეკუთვნის. ამასთანავე, მას მრავალი განუხორციელებელი პროექტი დარჩა.

თავში »რეპრესია 1957-1959« წარმოდგენილია აქამდე გამოუქვეყნებელი კოტე მიქაბერიძის ბიოგრაფიის დღემდე უცნობი, დაჭერისა და გასამართლების ამსახველი დოკუმენტაცია.

წიგნის შემდგენელ-გამომცემლებმა, ნინო ძანძავამ და სოსო დუმბაძემ ოთხწლიანი კვლევის შედეგად დაამუშავეს 14 სხვადასხვა არქივის 7.000-მდე საარქივო ფურცელი.

გამოცემაში დაბეჭდილია 76 საარქივო დოკუმენტი და 300-ზე მერი სხვადასხვა სახის შავ-თეთრი და ფერადი რეპროდუქცია: ფოტოსურათები, კადრები კინოფილმებიდან, შარჟები, ნახატები და სხვა.