წიგნის ანოტაცია
ავტორის მიზანია ი. კანტის ნაშრომთა ანალიზით თვალსაჩინო გახადოს, თუ რამდენად მნიშვნელოვანი და ორგანულია ადამიანის პრობლემატიკა გერმანელი ფილოსოფოსისათვის.
წიგნში ნაჩვენებია, რომ სამი „კრიტიკა“ ადამიანის სამი ძირითადი უნარის გამოკვლევაა, და შესაბამისად პასუხია სამ ფუნდამენტურ კითხვაზე: რა შეიძლება ვიცოდე? რა უნდა გავაკეთო? და რისი იმედი შეიძლება მქონდეს?
ძირითად ნაშრომებთან ერთად, ანთროპოლოგიური რაკურსით დალაგებულია, კანტის თითქმის მთელი მემკვიდრეობა. შედეგად მივიღეთ საინტერესო კონცეფცია – პასუხით კითხვაზე: რა არის ადამიანი?
წიგნის ავტორმა წარმატებით გამოიყენა თანამედროვე ჰერმენევტიკული მიდგომა. ესაა წარმატებული მცდელობა, კერძოდ, იმ შესაძლებლობის გაჩენა, რომ კანტის ფილოსოფია „აღმოვაჩინოთ და შევაფასოთ“, როგორც მთლიანი, უნივერსალური ინტელექტუალური პროდუქტი.
კლიშედ ქცეული ფორმალური დაყოფის, ისტორიციზმის გარეშე. ამის შედეგად შესატყვისი რეზულტატიც მივიღეთ: კერძოდ, ორგინალურად ინტერპრეტირებული, ამასთანავე სისტემაში ინტეგრირებული ანთროპოლოგიური კონცეფცია, რაც წიგნს სამართლიანად სძენს გამორჩეულ ღირებულებას.
თამამად შეიძლება ვთქვათ, რომ აკადემიურ სივრცეს შეემატა მაღალი დონის მნიშვნელოვანი მონოგრაფია, რომელიც უთუოდ გამოადგება არა ერთ მკვლევარს. ვიმედოვნებთ, წიგნს დიდი ინტერესით წაიკითხავს ყველა, ვისთვისაც ძვირფასია კლასიკური მემკვიდრეობა, აინტერესებს ანთროპოლოგიური თემატიკა და აქვს მძაფრი რეფლექსია ეგზისტენციური გამოწვევების მიმართ.
ნინო თომაშვილი – პროფესორი, თსუ
კახა ქეცბაია – პროფესორი, თსუ
