წიგნის ანოტაცია
გამოჩენილი რომაელი მწერლის, პოლიტიკური მოღვაწისა და ბრწყინვალე ადვოკატის, მარკუს ტულიუს ციცერონის სახელი, უპირატესად, ორატორულ ხელოვნებასთან არის დაკავშირებული. ფილოსოფიურ ტრაქტატებზე სამუშაოდ ციცერონი მხოლოდ მაშინ იცლიდა, როცა თავისუფალი იყო პოლიტიკური და ადვოკატური საქმიანობისაგან. თავის ტრაქტატებში იგი ეხება ფილოსოფიის, პოლიტიკის, რელიგიისა და ეთიკის საკითხებს. ციცერონი, რომელსაც ბრწყინვალე განათლება ჰქონდა მიღებული ბერძენი მასწავლებლების წყალობით, თავის ტრაქტატებში ბერძნული ფილოსოფიური სკოლის წარმომადგენელთა შეხედულებების ანალიზის საფუძველზე გვთავაზობს საინტერესო მსჯელობებს სახელმწიფოს, კანონების, ზნეობის შესახებ, რომლებიც გაჯერებულია მაგალითებით საბერძნეთისა და რომის ისტორიიდან.
ციცერონის ტრაქტატი „ტუსკულანური საუბრები“ დაწერილია ხუთ წიგნად, დიალოგის, კითხვა-პასუხის სახით, მასწავლებელსა და მოსწავლეს შორის. მასში წარმოდგენილია ტუსკულანუმში (ციცერონის ვილაში) გამართული საუბრები.
ტრაქტატი ეძღვნება მარკუს ბრუტუსს. I წიგნი ეხება სიკვდილის თემას, არის თუ არა იგი ბოროტება, როგორ უნდა შევებრძოლოთ მას. II წიგნის თემა არის ტკივილის დათმენა, III წიგნში საუბარია მწუხარების განქარვებაზე. IV წიგნში არის მსჯელობა სულიერი ვნებების შესახებ, ხოლო V წიგნი ეძღვნება სათნოებასა და მის სახეებს, იმის გარკვევას, არის თუ არა საკმარისი სათნოება ბედნიერების მისაღწევად.