წიგნის ანოტაცია
სპინოზამ თავისი ფილ. სისტემა მკაცრი მათემატიკური მეთოდით, ევკლიდეს გეომეტრიის მსგავსად დაალაგა. მიუხედავად ამისა, მისი ფილოსოფია იძლევა ურთიერთგამომრიცხველი ინტერპრეტაციის საშუალებას. მაგ. ჰეგელი მას აბსოლუტურ იდეალისტად, „კარტეზიანული ფილოსოფიის ობიექტივირებად“ მიიჩნევდა. ფრანგი ენციკლოპედისტებისთვის კი ის იყო მატერიალისტი და ათეისტი. მეტიც, მარქსისა და ენგელსის დიალექტიკურ მატერიალიზმს სპინოზიზმის სახეობად განიხილავდნენ (მაგ. პლეხანოვი).
წინამდებარე წიგნი არ არის სპინოზას ფილ. ანალიზი. ის უფრო რომანია „ყველაზე კეთილშობილ და ზნეობრივად ყველაზე მაღლა მდგომ დიდ ფილოსოფოსთა შორის“ – სპინოზას, ფრიად სადა ცხოვრებაზე. რომელიც, სოკრატეს მსგავსად, პრაქტიკაში იმ პრინციპების ერთგული იყო, რასაც ფილოსოფიაში, თეორიაში მკაცრი ლოგიკით ასაბუთებდა.
ამდენად, სპინოზას ბიოგრაფიული (ცხოვრებისეული) მომენტების გათვალისწინება მნიშვნელოვანია მისი ფილოსოფიის არსში ჩასაწვდომად.
***
გამომცემლობა იწყებს სერიას – „გამოჩენილ ფილოსოფოსთა ცხოვრება“. იმ ფილოსოფოსთა ბიოგრაფიების ამსახველი წიგნების გამოცემას, რომელთა ნააზრევის გაგება შეუძლებელია მათი ცხოვრების გაცნობის გარეშე. თუ ამ პირველ წიგნს მკითხველი კეთილად შეხვდება, გადავდგამთ შემდეგსაც და შემოგთავაზებთ პლატონის, კანტის, შელინგის, ჰეგელის, ჰაიდეგერის ბიოგრაფიებს.
გონივრულ რჩევებს და წინადადებებს გავითვალისწინებთ.
