ღმერთის დელუზია:
„ღმერთის დელუზია“ ჩვენი დროის საკულტო საერთაშორისო ბესტსელერად იქცა. რიჩარდ დოკინსს თავდაპირველი პოპულარობა მოუტანა „ეგოისტმა გენმა“, რასაც მოჰყვა ბესტსელერი წიგნების სერია: „განვრცობილი ფენოტიპი“, „ბრმა მესაათე“, „ედემიდან გამომავალი მდინარე“, „ასვლა არასარწმუნო მთაზე“, „ცისარტყელას დაშლა“, „წინაპრის ამბავი“ და მცირე ზომის ნაწარმოებთა კრებული „ეშმაკის კაპელანი“. მისი ბოლო წიგნია „რეალობის მაგია“. დოკინსი როგორც ლონდონის სამეფო საზოგადოების, ისე ლიტერატურის სამეფო საზოგადოების წევრია. მას მიღებული აქვს მრავალი ჯილდო, მათ შორის – ლიტერატურის სამეფო საზოგადოების ჯილდო (1987 წ.), ლონდონის სამეფო საზოგადოების მაიკლ ფარადეის სახელობის ჯილდო (1990 წ.), საერთაშორისო კოსმოსური პრემია ადამიანის კვლევის მეცნიერებებში განხორციელებული მიღწევებისთვის (1997 წ.), კისტლერის პრემია (2001 წ.), შექსპირის სახელობის პრემია (2005 წ.), ლუის ტომასის სახელობის ჯილდო მეცნიერების შესახებ წერისთვის (2006 წ.) და ბრიტანული ლიტერატურული დაჯილდოების – „გალაქსის“ წლის ავტორის პრემია (2007 წ.). დოკინსი 2008 წელს გადადგა ოქსფორდის უნივერსიტეტის ჩარლზ სიმონის სახელობის პროფესორის თანამდებობიდან – მეცნიერების შესახებ საზოგადოების ინფორმირების დარგში და დღემდე ოქსფორდის ახალი კოლეჯის სამეცნიერო საზოგადოების წევრად რჩება.

ეგოისტი გენი:
„მოდით, შევეცადოთ ვისწავლოთ გულუხვობა და ალტრუიზმი, რამეთუ ეგოისტებად ვართ დაბადებულნი. მოდით, გავარკვიოთ, თუ საით მიისწრაფვიან ჩვენი ეგოისტი გენები, რადგან ამით შეიძლება მათი განზრახვების განხორციელებისთვის ხელის შეშლის შანსი მოგვეცეს, რაც არც ერთ სხვა სახეობას არ გამოსვლია არასდროს“. „ინდივიდუუმები არ არიან სტაბილურები – მათ ხანმოკლე არსებობა უწერიათ. ქრომოსომებიც ისევე მიეცემიან ხოლმე დავიწყებას, როგორც კარტის ხელი დარიგებიდან მალევე, გათამაშების შემდეგ. მაგრამ კარტებს არევისას არაფერი ემართებათ. კარტები გენებია. გენები არ ზიანდება კროსინგოვერისას, ისინი უბრალოდ პარტნიორებს იცვლიან და არსებობას აგრძელებენ. რა თქმა უნდა, ისინი არსებობას აგრძელებენ. ეს მათი სამუშაოა. ისინი რეპლიკატორები არიან და ჩვენ – მათი გადარჩენის მანქანები. როდესაც ჩვენ მისიას ვასრულებთ, თავიდან გვიშორებენ. ხოლო გენები გეოლოგიური დროის მკვიდრნი არიან: ისინი მარადიულად არსებობენ“.