გამოცემა აერთიანებს ავტორის სამ ფუნდამენტურ ნაშრომს (ლექციათა სამ ციკლს): 1. ადამიანის და კაცობრიობის სულიერი წარმმართველობა (კაცობრიობის ევოლუციის სულისმეცნიერული მიმოხილვა), 2. გრძნობათა სამყარო და სულის სამყარო, 3. ანთროპოსოფიულად შემეცნებული ზეგრძნობადი ადამიანი.

სათაურით, „სულისმეცნიერული ნაშრომები“ აღნიშნული ციკლები წარმოგვიდგენს ერთ ჰარმონიულ სურათს, რომელშიც ადამიანის მთელი არსება – მისი მიწიერ-ზემიწიერი განვითარება და კაცობრიობის ერთიანი ბედი არქიტექტონური სიმწყობრითაა ჩამოქნილი.

მართალია, ყოველ ცალკეულ ციკლში წარმოდგენილია სულიერი სიმაღლეებისკენ მიმავალი ერთი განკერძოებული გზა, მაგრამ მთლიან კავშირში ეს არის მცდელობა, ერთგვარი გამოწვევა – კიდევ ერთი ნაბიჯით მივუახლოვდეთ და მშვინვიერ გავითავისოთ ის, რაც სადღეისოდ უხილავია, რამდენადაც სწორედ ეს უხილავი განსაზღვრავს ჩვენს არსებობას – ჩვენს აწმყოს და მომავალს.

ორიოდ სიტყვით მინდა ისიც ალვნიშნო, რომ მთლიანობაში, წიგნის შინაარსი წარმოადგენს არა მხოლოდ სიტყვიერ გადმოცემულ ჭეშმარიტებას, არამედ განიცდება, როგორც სულიერი მოვლენა – როგორც ცოცხალი არსება, რომელიც თავად თვითონ ბადებს თავის თავს კოსმოსური სინამდვილიდან ამონაკვთულ სიტყვებში და განაცხადებს ადამიანის მთელი შინაგანი არსის სტრუქტურას, ცხოვრების შიდადინებას, სულიერის კავშირს კაცობრიობის ბედთან და, რაც განსაკუთრებით საგულისხმოა, ადამიანის მაკროკოსმოსურ წარმომავლობას, სავსებით თანახმიერს სახარების სიტყვებთან – „თქვენ ღმერთები ხართ, უზენაესის შვილები ხართ ყველანი!“