სიცოცხლე, სიყვარული, სიცილი:

ავტორის მრავალრიცხოვან ნაწარმოებთაგან ერთ-ერთი „სიცოცხლე, სიყვარული, სიცილი“, სამ ნაწილადაა დაყოფილი.

სიცოცხლე – აღსავსე თავიდან დაბადების პოტენციალით, რათა სრულფასოვნად შევიგრძნოთ ჭეშმარიტი არსი; სიყვარული – მარადიული გრძნობა, მის გასაღვივებლად ნუ მოძებნით კონკრეტულ ობიექტს, რომელიც წარმავალის ნაწილია. უარყავით ცნება „წყვილი“, რათა იქცეთ ერთ მთლიანობად, ნუ გაებმებით ქორწინების მარყუჟებში, რათა გიყვარდეთ უპირობოდ; დაბოლოს, სიცილი – გულწრფელი სიცილი ცალსახად იქცევა სულიერ მკურნალად, რასაც არაერთი აღმოსავლელი გასხივოსნებული გვიმტკიცებს.

განთავისუფლდით ყოველგვარი თავსმოხვეული წარმოდგენებისგან, რათა იქცეთ სრულყოფილად – ამბობს ავტორი. აღნიშნული წიგნი წინ გადადგმული ნაბიჯია სულიერი ტრანსფორმაციისკენ, რაც მუდამ უპირველეს მიზანს წარმოადგენდა ოშოსთვის.

მომავლის ადამიანის უფლებები:

„მომავლის ადამიანის უფლებები“ ავტორის ერთ-ერთი მნიშვნელოვანი პუბლიკაციაა, რომელშიც იგი აკრიტიკებს ადამიანის უფლებების დეკლარაციას და პირად თუ სხვათა გამოცდილებაზე დაყრდნობით მსჯელობს თითოეული უფლების შესახებ. კრიტიკის პარალელურად ავტორი აყალიბებს ადამიანის სამ ძირითად უფლებას, ესენია: სიცოცხლის უფლება, სიყვარულის უფლება და სიკვდილის უფლება.

წიგნში ასევე შესულია ავტორის ვრცელი ბიოგრაფია, რომელშიც მისი ცხოვრების მნიშვნელოვანი ეპიზოდებია გადმოცემული.

გზა სრულყოფილებისაკენ:

ოშოს „გზა სრულყოფილებისაკენ“ აერთიანებს ავტორისა და მისი მოწაფეების საუბრებს, რომლებიც ხუთი დღის განმავლობაში მიმდინარეობდა. წიგნი მოიცავს მოძღვრებებს იმის შესახებ, თუ რა არის საჭირო სულიერი სრულყოფილების მისაღწევად. ოშო ამ გზის საბოლოო მიზნად თვითშეცნობას, შინაგანი თვითარსის გამოთავისუფლებას სახავს.