როგორ გავიგოთ ადამიანის ბუნება:

ეს წიგნი წარმოადგენს დიდი ავსტრიელი ფსიქოლოგისა და ფსიქიატრის ალფრედ ადლერის მცდელობას ფართო მკითხველს გააცნოს პიროვნების ფსიქოლოგიის საფუძვლები. იმავდროულად მასში დემონსტრირდება ფსიქოლოგიური პრინციპების პრაქტიკული გამოყენება გარემომცველ სამყაროსთან და სხვა ადამიანებთან ჩვენი ყოველდღიური ურთიერთობის არა მარტო ასაწყობად, არამედ ჩვენი შინაგანი ცხოვრების ორგანიზაციისთვისაც.

ამ წიგნს საფუძვლად ედება ლექციების ერთწლიანი კურსი, რომელიც ადლერმა წაიკითხა ვენის სახალხო ინსტიტუტში ყველა ასაკისა და პროფესიის ასობით მამაკაცისა და ქალისგან შემდგარი აუდიტორიის წინაშე. ამ წიგნის მიზანია – პირველ რიგში, გვიჩვენოს, თუ ერთი ადამიანის ქცევის არასწორად არჩეულ წესს როგორი დისჰარმონია შემოაქვს ჩვენს საზოგადოებრივ ცხოვრებაში: მეორე მხრივ, ცალკეულ ადამიანებს ასწავლოს თუ როგორ მოხდეს სოციალურ გარემოსთან ჰარმონიული ადაპტირება. შეცდომები მეცნიერებასა და ბიზნესში ძვირად უჯდებათ, თუმცა ცხოვრების გზის არჩევაში დაშვებულმა შეცდომებმა შეიძლება თავად ცხოვრება ჩააგდონ საფრთხეში. მაშასადამე, ამ წიგნის მიზანია – ადამიანის ბუნების უკეთესად გაგებისთვის კაცობრიობის გზის განათება.

ორმოცდაათ საუკეთესო ფსიქოლოგიურ ნაწარმოებთა შორის ადლერის მრავალრიცხოვანი წიგნებიდან სწორედ ეს წიგნია დასახელებული. წიგნი განკუთვნილია ფსიქოლოგების, ფსიქიატრების, სტუდენტების და ადამიანის ფსიქიკური ცხოვრებით დაინტერესებული ფართო წრისათვის.

ცხოვრება მეცნიერებაა:

წიგნი ეხება დიდი ავსტრიელი ფსიქოლოგის მიერ შექმნილ „ინდივიდუალური ფსიქოლოგიის“ აქტუალური საკითხების განხილვას. ადლერმა გააკრიტიკა ფროიდის სწავლება ადამიანთა ქცევის დეტერმინაციაში სექსუალობისა და არაცნობიერის გაზვიადების გამო. მან აქცენტი გააკეთა სოციალური ფაქტორების როლზე, კერძოდ, ხაზს უსვამდა ლტოლვების სოციალურ მიმართულებას, როგორც ადამიანის ხასიათის საფუძველს.

სქესთა შორის ურთიერთობები:

დიდი ავსტრიელი ფსიქოლოგის და ფსიქიატრის ალფრედ ადლერის ამ შესანიშნავ წიგნში გადმოცემულია მის მიერ შექმნილი სექსუალობის თეორია, რომელშიც მკვეთრად დაუპირისპირდა ზიგმუნდ ფროიდის შეხედულებებს. იმ დროს, როცა ფროიდი თვლიდა, რომ პიროვნების განვითარებას განაპირობებს, უპირველეს ყოვლისა, ინდივიდუუმის სექსუალური მისწრაფებები, ადლერი, პირიქით, ამტკიცებდა, რომ თავად პიროვნება მთელი მისი მრავალფეროვნებით, ინდივიდუუმის ცხოვრების ნირი განსაზღვრავს სექსუალური მისწრაფებების ხასიათს.

წიგნი შედგება ორი ნაწილისგან, რომლებშიც ოთხი თავი შედის. პირველი თავი ხსნის ადლერის შეხედულებებს „ქალურ საკითხზე“, რომელთა მიხედვითაც ცხადია, რომ ის სქესთა თანასწორობის მომხრეა. მეორე თავში გაკრიტიკებულია სქესთა შორის ურთიერთობების ფროიდისეული თეორია. მეორე ნაწილის მესამე თავში განხილულია მამაკაცებს და ქალებს შორის სექსუალური ურთიერთობები ფსიქოლოგიურ ასპექტში, სქესობრივი აღზრდისა და სქესობრივი მომწიფების საკითხები. ამავე ნაწილის მეოთხე თავში გამოკვლეულია სიყვარულისა და ქორწინების პრობლემები, მათ შორის ყოველგვარი გართულებების მიზეზები, გამოვლენილია სიყვარულისა და ქორწინებისთვის მომზადების პერიოდში წარმოქმნილი მამოძრავებელი ძალები.

წიგნი განკუთვნილია ფსიქოლოგების, ფსიქიატრების, სტუდენტების და სქესთა შორის ურთიერთობებით დაინტერესებულ მკითხველთა ფართო წრისათვის.