დიალოგი „ფედონი“, რომელსაც გამომცემლობა „Carpe diem“ სთავაზობს მკითხველს, დიდი ბერძენი ფილოსოფოსის – პლატონის (427-347) ერთ-ერთი უმნიშვნელოვანესი თხზულებაა.

პლატონური ფილოსოფიის კარდინალური მომენტების დასაბუთების გარდა (მოგონების თეორია, დაპირისპირებულთა თეორია, იდეათა თეორია და სხვა), „ფედონი“ მიზნად ისახავს სულის უკვდავების მტკიცებას.

მიუხედავად მტკიცების არასაკმარისობისა (ერთი თანამედროვე მკვლევარის თქმით, „ფედონი“ დღეს უფრო გვაღელვებს, ვიდრე გვარწმუნებს“), ეს ნაწარმოები მაინც რჩება პლატონის დიალექტიკური აზროვნებისა და მხატვრული ოსტატობის უბრწყინვალეს ნიმუშად.