ზულეიხანი არსად არ არის

მე გთავაზობთ არსებობის და ღმერთობის აქამდე უცნობ ვარიანტს. ნოველა პოსტმოდერნისტული მაგიური რეალიზმის მიმდინარეობაა. ის ეფუძნება იმ მეცნიერულ თუ ფილოსოფიურ იდეას, სადაც დღევანდელი დღისთვის, ხვალინდელი დღე ის ალტერნატიული რეალობაა, რომელშიც შეიძლება აბსოლუტურად ყველაფერი მოხდეს. ამ ყოველ „ხვალეში“ დიდი დოზით შეყვანილია აბსურდის და ნიჰილიზმის ფილოსოფია. სწორედ ასეთ სამყაროში ცხოვრება უწევს ჩემი წიგნის მთავარ პერსონაჟს, ზულეიხანს აქემენიიდან, რომელიც მიდიელების წინააღმდეგ უშიშრად იბრძვის, თუმცა როგორც ზემოთ ავღნიშნე შეიძლება ბრძოლის ველიდან მოულოდნელად ვუდსტოკის ფესტივალზე აღმოჩნდეს, სადაც ბი ბი კინგს მოუსმენს, ოკუპირებულ ქერმანში ისკარიოტელად იქცეს და მესიის გაყიდვა მოუწიოს, ან კიდევ კოსმოს აბსურდისტი მკვიდრი იყოს, სადაც ყოვლისშემძლე პროფესორი ცააბა ამცნობს მას და სხვა ყველა მოსახლეს, რომ რეალურად ერთი პატარა თანამგზავრის ერთ პატარა პროცესორში ცხოვრობენ და თუ ომს არ დაამთავრებენ ეს პროცესორი უბრალოდ დაიწვება. სიუჟეტში ორი, ჩვენთვის ნაცნობი სამყაროების გადაკვეთა ხდება ამის მეცნიერული გაგებით და ეს ორი სამყარო არის მხატვრული ლიტერატურული და ყოფიერი. შეიძლება ისე ახლოსაც კი არის ამ ორ სამყაროს შორის კვეთა, რომ სხვა დროს, ამაზე არც ერთ ხელოვნების დარგში უსაუბრიათ.