სულის შესახებ

არისტოტელეს „სულის შესახებ“ ტრაქტატის პირველი თარგმანი ძველი ბერძნული ენიდან ქართულ ენაზე, რომელიც გამოქვეყნდა 2001 წელს, ეკუთვნის პირველ ქართველ ფილოსოფოს ქალს თამარ კუკავას, ახლანდელი მეორე გამოცემა ქვეყნდება 23 წლის შემდეგ, 2024 წელს.

თამარ კუკავა (1921-2007) იყო ივანე ჯავახიშვილის სახელობის თბილისის სახელმწიფო უნივერსიტეტის პროფესორი და სავლე წერეთლის სახელობის ფილოსოფიურ მეცნიერებათა აკადემიის აკადემიკოსი, ფილოსოფიის სხვადასხვა დარგში მოღვაწე მეცნიერი, მთარგმნელი და პუბლიცისტი.

თამარ კუკავა 30-მდე წიგნის ავტორია, რომელთა შორისაა მონოგრაფიები, სახელმძღვანელოები და თარგმანები, წიგნების თემატიკა მრავალფეროვანია: ქართული ფილოსოფიის ისტორია. ბერძნული ფილოსოფიის ისტორია, ეთიკა და ესთეტიკა. დემოკრიტესა და ეპიკურეს ფრაგმენტების (1959) შემდეგ ძველი ბერძნული ენიდან მას ნათარგმნი აქვს არისტოტელეს 6 წიგნი: „მეტაფიზიკა“ (1964, 2021), „რიტორიკა“ (1981), „დიდი ეთიკა“ (1994) „პოლიტიკა“ (ორ ნაწილად, 1995 და 1996), „სულის შესახებ“ (2001, 2024) და „ნიკომაქეს ეთიკა“ (2003).

წინამდებარე გამოცემა არის შევსებული გამოცემა, რომელსაც გარკვეული ტერმინოლოგიური და შინაარსობრივი განმარტებებიც ერთვის თან.