თქვენს წინაშეა კობერვიცში წაკითხული ლექციების კურსი, რომლითაც თითქმის 100 წლის წინ, 1924 წელს, დოქტორმა რუდოლფ შტაინერმა საფუძველი ჩაუყარა ბიო-დინამიკურ მიწათმოქმედებას.

სახელი „ბიო-დინამიკური“ ორი ცნებისგან შედგება: „ბიო“ აღწერს მიწათმოქმედებას, რომელიც სიცოცხლის კანონებით ხელმძღვანელობს, „დინამიკური“ კი ამ კონტექსტში გულისხმობს მიწათმოქმედებაში იმ ძალების და პრინციპების გამოყენებას, რომლებიც სუბსტანციებში და სუბსტანციებზე მოქმედებენ. ბიო-დინამიკური მეურნეობები 1924 წლიდან არსებობენ და ამგვარად თანამედროვე ბიომეურნეობების წინამორბედნი არიან. ლექციების ეს კურსი იყო რუდოლფ შტაინერის პასუხი მიწათმოქმედთა შეკითხვაზე, თუ რა შეიძლებოდა გაკეთებულიყო დედამიწის ყვლეფისა და საკვები პროდუქტების ხარისხის გაფუჭების საპირწონედ. დღესდლეობით მთელს მსოფლიოში წარმატებით მუშაობს 6396 სერთიფიცირებული ბიო-დინამიკური მეურნეობა და 3000 მეტი – არასერთიფიცირებული.

ლექციების ეს კურსი უპირველეს ყოვლისა გამიზნულია იმ ადამიანებისთვის, ვინც უკვე იცნობს ანთროპოსოფიას და აპირებს ბიო-დინამიკური მეთოდით მიწათმოქმედებას. და ასევე მათთვის, ვინც ახლოს დგას მიწათმოქმედებასთან და სურს დაიბრუნოს და ცნობიერი გახადოს ის ინსტიქტური ცოდნა, რომელიც უძველეს ტრადიციებთან ერთად დაიკარგა.