წიგნის ანოტაცია
თსუ კლასიკური ფილოლოგიის, ბიზანტინისტიკისა და ნეოგრეცისტიკის ინსტიტუტში გაიმართა ენციკლოპედიის Caucasus Antiquus მეორე ტომის პირველი ნაკვეთის პრეზენტაცია. პირველ ტომში, რომელიც 2010 წელს გამოიცა, კავკასიის შესახებ ძველაღმოსავლური, ბერძნული და ლათინური წყაროები იყო თავმოყრილი. ეს ნაკვეთი კი ოთხასზე მეტ საენციკლოპედიო სტატიას მოიცავს ა ასოზე.
ენციკლოპედიაში წარმოდგენილია შემდეგი სახის ინფორმაცია: ა) ანტიკურ და ასევე ძველ აღმოსავლურ (ძირითადად ასირიულსა და ურარტულ) წყაროებში დადასტურებული კავკასიასთან დაკავშირებული ყველა ტერმინი (გეოგრაფიული, მითოლოგიური, ისტორიული სახელები); სტატიების ეს ჯგუფი მოიცავს ლექსიკონის უმეტეს ნაწილს; ბ) ცნებები – რელიგიური, სოციალური, კულტურული ცხოვრების ამსახველი; გ) ანტიკური ხანის ყველა ავტორი, რომელმაც შემოგვინახა ცნობები კავკასიის შესახებ. ეს სტატიები შემოიფარგლება ძირითადად კონკრეტული მწერლის სახელის, მოღვაწეობის დროის და მის ამა თუ იმ ნაწარმოებში კავკასიასთან დაკავშირებულ იმ ტერმინთა ჩამოთვლით, რომლებსაც ლექსიკონში ცალკე სტატიები ეძღვნება; დ) კავკასიის ტერიტორიაზე აღმოჩენილი ანტიკური ხანის ის ობიექტები (დასახელება, სამარხი, ცალკე ძეგლი), რომლებიც, მართალია, ანტიკურ წყაროებში არ მოიხსენიება (ან მათი იდენტიფიკაცია წყაროების მონაცემებთან საეჭვოა), მაგრამ კლასიკური არქეოლოგიისათვის საყურადღებო მონაცემებს იძლევიან.
მეორე ტომის პირველი ნაკვეთის სტატიებზე მუშაობდნენ: ნიკოლოზ ალექსიძე, ვალერი ასათიანი, ქეთევან გარდაფხაძე, ლევან გორდეზიანი, რისმაგ გორდეზიანი, მაია დანელია, ირინე დარჩია, თინა დოლიძე, თეა დულარიძე, თედო დუნდუა, მარიკა ერქომაიშვილი, თამარ თარხნიშვილი, გურამ ლორთქიფანიძე, მარიკა მშვილდაძე, ქეთევან ნადარეიშვილი, ანეგრეტ პლონტკე-ლიუნინგი, თამარ ჭეიშვილი, ზაზა ხინთიბიძე, თამარ ჯაფარიძე.
ენციკლოპედია მზადდება თსუ კლასიკური ფილოლოგიის, ბიზანტინისტიკისა და ნეოგრეცისტიკის ინსტიტუტის ბაზაზე და გამოცემის დასრულება მომდევნო ოთხი წლის განმავლობაშია გათვალისწინებული.