წიგნის ანოტაცია
ტაციტუსი იყო რომაული ისტორიოგრაფიის თვალსაჩინო წარმომადგენელი და დიდი ორატორი. მისი სახელი, სავარაუდოდ, არის პუბლიუს (ან გაიუს) კორნელიუს ტაციტუსი. დაბადება-გარდაცვალების თარიღებიც მიახლოებითაა დადგენილი – 55 – 120 წწ. სხვადასხვა წყაროებით აღადგენენ ტაციტუსის ბიოგრაფიის ძირითად შტრიხებს: იგი იყო მხედართა წრიდან; მიიღო კარგი განათლება; დაქორწინდა ცნობილი მხედართმთავრის, აგრიკოლას, ასულზე; ეკავა მნიშვნელოვანი თანამდებობები სახელმწიფო აპარატში. იმპერატორ ტრაიანუსის დროს იყო პროვინცია აზიის პროკონსული. ტაციტუსი იყო ჩინებული ორატორი. მისი ცხოვრების ბოლო წლების შესახებ ცოტა რამ ვიცით.
ტაციტუსის ჩვენამდე მოღწეული ნაშრომებია: „იულიუს აგრიკოლას ცხოვრების შესახებ“ (მოკლედ, „აგრიკოლა“), „გერმანელთა წარმოშობისა და ადგილმდებარეობის შესახებ“ (მოკლედ, „ერმანია“), „დიალოგი ორატორების შესახებ“, „ისტორიანი“, „ანალები“. ამ მშრალი ბიოგრაფიული მონაცემებისა და თხზულებათა ჩამონათვალის მიღმა დგას ღრმად მოაზროვნე, ღირსეული პიროვნება, თავისი ქვეყნის ერთგული შვილი. მისი შემოქმედების გააზრება და მეცნიერული შეფასება აღორძინების ხანიდან დაიწყო. ტაციტუსი შერაცხეს საუკეთესო ისტორიკოსთა თანავარსკვლავედში.
„აგრიკოლა“ ტაციტუსის მცირე ზომის თხზულებაა. იგი არის მიცვალებულის საქებრად წარმოთქმული სიტყვა ე. წ. ლაუდატიო ფუნებრის. თუმცა ძნელია ეს ნაწარმოები მიაკუთვნო რომელიმე კონკრეტულ ჟანრს. სპეციალისტთა აზრით, „აგრიკოლა“ არის ბიოგრაფია, რომელიც გადადის ისტორიული ამბების თხრობაში; აქვე იკვეთება პოლიტიკური პამფლეტის ელემენტებიც.