მე-19 საუკუნის ბოლოს რამდენიმე ნაშრომი გამოვიდა, რომელთა მიზანი იყო ბრბოს ანალიზის საფუძველზე კოლექტიური ფსიქოლოგიის დაფუძნება. მათ შორის საუკეთესო სციპიონ სიგელეს ნაშრომი „დამნაშავე ბრბოა“. სიგელე კოლექტიური ფსიქოლოგიის აგებას ბრბოს ანალიზით იწყებს. იგი ამბობს: „ბრბოს ფსიქოლოგიის შესწავლა კოლექტიური ფსიქოლოგიის შესწავლაა“.

ეს ფენომენი სიგელესთან მხოლოდ ერთი სახეობითაა წარმოდგენილი, დამნაშავე ბრბოს სახით. სიგელე ცდილობს გადაწყვიტოს ბრბოს ორგანიზაციის პრობლემა, რათა საერთო ქმედებისთვის მისი წევრების პასუხისმგებლობის ზომა განსაზღვროს. იგი დარწმუნებულია, რომ ბრბო ბოროტებისაკენ უფრო მეტადაა მიდრეკილი, ვიდრე სიკეთისაკენ და ბრბოს რიცხოვნობის ზრდის კვალობაზე მისი სულიერი მოძრაობის ინტენსივობა მატულობს. სიგელეს ეს ნაშრომი სავსეა ბრბოს დანაშაულების ამსახველი უაღრესად საინტერესო ფაქტების ანალიზით, რაც მკითხველს უთუოდ ღრმად დააინტერესებს და ჩააფიქრებს. მას აინტერესებდა ძალაუფლების რეალიზაციის ფსიქოლოგია, ძალაუფლების მქონე უმცირესობის უმრავლესობაზე ბატონობის მექანიზმები. ამ თვალსაზრისით მის მიერ გაკეთებული დასკვნები დღესაც აქტუალურია.