სიზიფის მითი:
„ყველანაირი მორალი იმ აზრს ეფუძნება, რომ საქციელი მართლდება ან ქარწყლდება საკუთარი შედეგებით. აბსურდით გამსჭვალული გონება თვლის, რომ ეს შედეგები მშვიდად უნდა იქნეს განხილული. ის მზადაა ამისთვის საფასურიც გაიღოს. სხვაგვარად რომ ვთქვათ, თუ მისთვის არსებობენ პასუხისმგებლები, არ არსებობენ დამნაშავეები. უფრო მეტიც, ის თანხმდება მომავალი ქმედების საფუძვლად წარსულის გამოცდილება გამოიყენოს. დრო გააცოცხლებს დროს და სიცოცხლე მოემსახურება სიცოცხლეს…“ – ალბერ კამიუ.

უცხო:
რომანი „უცხო“ ალბერ კამიუს „აბსურდის ციკლს“ განეკუთვნება და ნობელიანტი მწერლის მერვე წიგნია, რომელსაც გამომცემლობა აგორა ქართულად სთავაზობს მკითხველებს. რომანის მთავარი გმირი, მერსო, პრინციპული ადამიანია, უცნაურია, საზოგადოებრივ მორალს ფეხს არ უწყობს და საზოგადოება მას უცხოდ ჩათვლის. წიგნის გმირი პირველ პირში მოგვითხრობს თავის ამბავს, ოღონდ დისტანციური და ცივი ტონით მას უბრალოდ ფაქტების ჩამონათვალად წარმოადგენს. თუმცა, მერსო პოზიტიური პიროვნებაა, უარს ამბობს ტყუილზე და ფაქტებს იღებს ისე, როგორებიც ისინი არიან. თვით კამიუს თქმით, მერსო არის ადამიანი, რომელიც ყოველგვარი გმირობის გარეშე, უბრალოდ თანხმდება, მოკვდეს სიმართლის გულისთვის. თხრობის მშრალი სტილი მაშინვე აგრძნობინებს მკითხველს, რომ მთავარ გმირსა და საზოგადოებას შორის ერთგვარი დაშორებაა, ისინი ერთმანეთს არ მიესადაგებიან. ამ სტილს როლან ბარტმა „თეთრი /ცარიელი წერა“ უწოდა ნაწარმოებში „წერის ნულოვანი დონე“. იგი ამბობს: „კამიუმ „უცხოთი“ პირველმა შემოგვთავაზა გამჭვირვალე სიტყვით წერის მანერა, რითაც შექმნა არარსებულის, არყოფნის სტილი ანუ სტილის იდეალური არარსებობა“. 1999 წელს, „უცხო“ მეოცე საუკუნის საუკეთესო წიგნად აღიარეს.

ვარდნა:
„ვარდნა“ კამიუს უკანასკნელი დასრულებული მხატვრული ნაწარმოებია. მთხრობელის ნარატივი გარეგნულად აღსარებას ჰგავს, მაგრამ ნანობს კი იგი რამეს?… სარტრის სიტყვებით, „ვარდნა“ კამიუს ყველაზე მშვენიერი და ყველაზე ძნელად გასაგები რომანია.