ავსტრიული წარმოშობის ამერიკელი მეცნიერი, პედაგოგი პიტერ დრაკერი (1909-2005) მე-20 საუკუნის მენეჯმენტის ერთ-ერთი ყველაზე გავლენიანი თეორეტიკოსია. თავისი კვლევებით მან მრავალი მნიშვნელოვანი მოვლენა იწინასწარმეტყველა მენეჯმენტსა და ეკონომიკაში, მათ შორის პრივატიზაცია და დეცენტრალიზაცია, იაპონიის საერთაშორისო ეკონომიკური გაძლიერება, მარკეტინგის მნიშვნელობა და გადამწყვეტი როლი.
მისი ყველაზე ცნობილი წიგნი „შედეგიანი მართვა“ ხელმძღვანელის ეფექტიანობის თემას ეხება. თანამედროვე ორგანიზაციაში ხელმძღვანელია ადამიანი, ვინც თავისი თანამდებობის ან ცოდნის გამო პასუხისმგებელია სამუშაოზე, რომელიც პირდაპირ გავლენას ახდენს ორგანიზაციის ფუნქციონირებასა და მის წარმატებაზე. შედეგიანი ხელმძღვანელი რომ გახდე, საკმარისი არ არის, ჭკვიანი იყო და ბევრი იშრომო. არავითარი განსაკუთრებული უნარი, ნიჭი ან მიდრეკილება არ არის საჭირო იმისათვის, რომ შედეგიანი იყო. ეფექტიანი მუშაობისთვის ხელმძღვანელმა გარკვეული – და საკმაოდ მარტივი – წესები უნდა დაიცვას, რომლებიც ამ წიგნშია აღწერილი და კომენტირებული. დღეს შედეგიანი ხელმძღვანელები სწრაფად იქცევიან საზოგადოების უმნიშვნელოვანეს რესურსად, ხოლო შედეგიანობა აუცილებელი ხდება ნებისმიერი ხელმძღვანელისთვის, რომელიც მიზნად ისახავს წარმატებას, თვითრეალიზებასა და მიღწევებს.
