„ფილოქტეტესი“ ერთადერთია სოფოკლეს ტრაგედიათაგან რომლის სცენაზე პირველად წარმოდგენის თარიღი ზუსტად არის ცნობილი: ძვ.წ. 409 წლის გაზაფხული. ეს ტრაგედია დრამატურგმა თავისი ცხოვრების მიწურულს დაწერა და იმ პრობლემას შეეხო, რაც მას მთელი ცხოვრების მანძილზე აწუხებდა. რა არის მთავარი ადამიანისათვის – ზნეობრივი სიწმინდე, თანდაყოლილი ღირსების შეულახაობა თუ საზოგადოების სიკეთით შენიღბული ცხოვრებისეული პრაგმატიზმი? ამ კითხვაზე ზუსტი პასუხი ტრაგედიაში არ ჩანს, რადგან ამაზე მაყურებელს უნდა ეფიქრა.