წიგნის ანოტაცია

„კავკასიურმა სახლმა“ ცნობილი ქართველი მწერლის ნაირა გელაშვილის მორიგი თარგმანი გამოსცა. თქვენს წინაშეა რობერტს ლიარდონის „ღმერთის გენერლები“, თორმეტი განსაცვიფრებელი ბიოგრაფია – ცხოვრება იმ თორმეტი ადამიანისა, რომელთაც შემოქმედი „ცათა და ქვეყნისა“, ისე შეესიტყვა, როგორც თავის დროზე მოსესა თუ პავლეს, და დიდი სულიერი საქმის აღსრულება დაავალა.

ეს თორმეტი ადამიანი მე-19 და მე-20 საუკუნეების – ანუ ნიჰილიზმის ეპოქის შვილები არიან. ეს ჩვენი ეპოქაა: როცა თითქმის მთელი მსოფლიო მატერიალიზმმა დაიპყრო, საბუნებისმეტყველო დარგების განვითარებას, ტექნიკის გლობალურ აღზევებას თუ ეკლესიის სისუსტეს რომ მოჰყვა. „ღმერთის გენერლებად“ წოდებული ადამიანები არც ერთ ეკლესიას არ ეკუთვნოდნენ. ისინი მარტო იდგენენ უხილავის წინაშე და მის ხმას ისმენდნენ. და მკერდზე მიკრული ბიბლიით მისდევდნენ ამ ხმას, რომელიც მათ მთელ ამერიკაში, ქალქიდან ქალაქში, შტატიდან შტატში დაატარებდა, ან ავსტრალიასა თუ აფრიკაში ამწესებდა, სწორედ ისე, როგორც ეს ხდებოდა ორი ათასი წლის წინ, როცა პირველი მოციქულები თავიანთ ხიფათიან გზებზე მთლიანად სულიწმინდის მიერ იმართებოდნენ.