ევაგრე პონტოელის De Oratione („ლოცვისათვის“), რომელიც 153 მცირე თავს შეიცავს, ქართულად ოთხჯერ უთარგმნიათ, მაგრამ არც ერთ ამ თარგმანში ნამდვილი ავტორი გაცხადებული არაა. ორ მათგანში ავტორად წმ. ნილოს სინელია დასახელებული, დანარჩენ ორში – წმ. ბასილი კესარიელი. წმ. ნილოსის სახელით წარწერილი პირველი თარგმანი (X საუკუნემდელი) ანონიმურია, მეორე კი, სავარაუდოდ, ეფრემ მცირეს ეკუთვნის (XI ს. მეორე ნახევარი). სხვა ორი თარგმანი, რომლებშიც ავტორად წმ. ბასილია გამოცხადებული, ეფთვიმე მთაწმიდელისაა (ორივე – გამოკრებული).
წინამდებარე გამოცემაში შეტანილია ორი ნარკვევი, რომელთაგან ერთი ეხება ევაგრე პონტოელის თხზულების იმ თარგმანებს, რომლებშიც იგი წმ. ნილოსს მიეწერება, მეორე ნარკვევში კი დანარჩენი ორი თარგმანია გამოკვლეული, კრიტიკული ტექსტების დართვით. ფსევდობასილის თხზულების ცალკეული ნაწილების ევაგრე პონტოელისადმი მიკუთვნება პირველად წინამდებარე პუბლიკაციით ცხადდება.