წიგნის ანოტაცია
წინამდებარე წიგნში გაერთიანებულია ერთი ჯგუფი ჩემი სამეცნიერო ნარკვევებისა, რომლებიც ძირითადად მანამდე შეუსწავლილი პირველწყაროების გამოვლენისა და ინტერპრეტირების საფუძველზე ქართველოლოგიური მეცნიერების სხვადასხვა უცნობ ფაქტსა და ახლებურ დასკვნებს წარმოაჩენს.
ეს სფეროები უპირატესად საისტორიო და ლიტერატურათმცოდნეობითია, ამასთან ერთად მათ შორისაა საკუთრივ ლინგვისტური და იურისპრუდენციული კვლევებიც. ნარკვევები სტატიების სახით ქვეყნდებოდა ათეული წლების მანძილზე, კერძოდ 1962 წლიდან 2020 წლის ჩათვლით. ვფიქრობ, თითოეული მათგანის გაცნობა მნიშვნელოვან სამსახურს გაუწევს შესაბამისი პრობლემატიკით დაინტერესებულ მკვლევარებს.
ამასთან ერთად, მინდა იმედი ვიქონიო, რომ ქართველოლოგიური და ზოგადად ჰუმანიტარული მეცნიერებებით დაინტერესებულ ახალგაზრდა მკვლევარებში ეს ნარკვევები აღძრავს წარმოჩენილი პრობლემატიკის მიმართულებით კვლევების გაგრძელების ინტერესს, იმ ზუსტი მეცნიერული და მეთოდოლოგიური პრინციპულობით, რომლებზეც ვცდილობდი ჩემი ძიებების დამყარებას.
წიგნში თავმოყრილი თითოეული სტატია ქვეყნდება თავდაპირველი პუბლიკაციის სახით, ზოგიერთ შემთხვევაში მცირე სიახლითა და შემოკლებით. ამან ერთი უხერხულობა გამოიწვია: ზოგჯერ სხვადასხვა სტატიაში ერთი და იმავე ფაქტის განმეორება ხდება, რასაც თავი ვერ ავარიდე; მკითხველს მინდა ბოდიში მოვუხადო.